Non haberá Plan (3)

Xa o afirmabamos hai meses: non haberá PXOM. Dixémolo antes que o pitoniso García Costas (ese crack), o cal, todo hai que dicilo, non ten mérito ningún. Os adalides da "seguridade xurídica" saben que non é posible aprobar o chapuceiro texto actual (que versión?), tozudamente mantido en precario polos que semellan xogarse algo máis cá votos neste lance. Imposible aprobalo polos informes da Consellería de Política Territorial, sistematicamente ignorados polo Concello; inviable por non facer as substanciais modificacións ordeadas pola Consellería de Cultura... pero, o que é pior -e é algo inexplicablemente obviado durante estes meses-: imposible porque a Consellería de Medio Ambiente AÍNDA NON AUTORIZOU A EXCEPCIONALIDADE solicitada xa en outubro do ano pasado (tras un breve período de calculada desobediencia civil de C.Porro), obrigada pola aplicación insoslaiable da LEI 9/2006, de 28 de abril, sobre avaliación dos efectos de determinados plans e programas no medio ambiente).

Moito nos tememos que o equipo de Pachi Vázquez, por máis que o intenta, non dá atopado a fórmula para validar a chapuza medioambiental deste Plan, cuxo estudio de sustentabilidade foi variado e revariado polos redactores para tratar de dar cobertura virtual -sen modificalas- ás barbaridades insostibles do planeamento a medida redactado por Consultora Galega e duramente criticado, xa na súa primeira versión, polos propios técnicos municipais de medio ambiente. Entre outras graves deficiencias, por exemplo, a da grave fragmentación dos espacios verdes e o non cumprimento da obrigada conectividade eco-paisaxística.

Moito nos tememos que este parcheadísimo Plan é xa intrinsecamente inarranxable. Alguén debería pidirlle contas -e devolución dos cartos- aos ineptos de Consultora Galega e ós instigadores internos de tamaña desfeita: Igznogood Figueroa e Toba Girón.