A opinion de OUTROVIGOÉPOSIBLE

A Comisión de coordinación de OUTROVIGOÉPOSIBLE fainos chegar un comunicado sobre o futuro da ETEA. Consideran que “a ordenación dos terreos e instalacións da ETEA constitúe, sen dúbida, unha desas oportunidades históricas que se lle van presentando a Vigo”

Trátase dun recinto, continua a nota que ofrece unhas posibilidades destacadas para unha ordenación exemplar, que conxugue espazo público, arquitectura, natureza e harmónica relación mar-cidade.
A Comisión opina que en correspondencia coa súa orixe, a titularidade do recinto debe ser pública na súa totalidade, subtraída das especulacións urbanísticas e recuperada para o supremo interese da cidade e fóra da presión constructiva que nos invade, tan nidiamente explicitada no Plan Xeral de Ordenación Urbana, que se tramita na actualidade.
Outrosí o recinto debe constituír un espazo público, aberto aos intereses globais da cidadanía, entendidos con sentido de futuro, estimulando sinerxías e contextualizado axeitadamente na realidade dunha cidade mariñeira, pescadora, investigadora e urxida de xestión en I+D+i..


A nota chama atención sobre a grata coincidencia dunha oferta de potencialidades inmensas, formulada polas dúas Administracións circundantes, a Central e a Autonómica, maila posibilidade de xunguir tamén, no que proceda, á Europea. Trátase da CIDADE DO MAR.

O recinto da ETEA é o marco axeitado e a ubicación perfecta neste momento para desenvolver o devandito proxecto, ao noso xuízo. Porén, pode outorgar outros servizos á cidade. Mencionamos algúns deles. Sería, en primeiro lugar, a sede ideal do Parque das Illas Atlánticas – non o Edificio Cambón- polas posibilidades para o Centro de Interpretación, pola súa proximidade ó mar, pola canalización como espazo público, educativo e cultural, etc. En segundo lugar, podería incluírse nela o aparello administrativo-operativo da futura e posible Reserva da Biosfera. En terceiro lugar, terían cabida instalacións relacionadas co mar, como escolas públicas de navegación, actividades de taller e musealización etnoantropolóxica, e outras de lecer, como centros polideportivos.

A asociación desexa facer chegar a opinión pública o feito de que se lle presenta a Vigo unha oportunidade histórica de desenvolver un proxecto integrador, de enorme potencial na xeración de recursos humanos de calidade, de innovación, desenvolvemento, acorde coas prospectivas máis serias de futuro,con implicacións económicas de calado, enormemente engaiolante. E que, por unha vez, dispón do lugar axeitado, ao noso parecer.
Rematan afirmando que hai proxecto, hai, xa que logo, asentamento idóneo. Só pode agardarse xenerosidade no consenso pola banda de todos os sectores implicados. E unha execución impecable e rápida. ¿Desaproveitará Vigo unha ocasión como esta?