Novo goberno ou goberno NOVO? (2)

Comunicación ou propaganda: unha rexeneración necesaria

Tódolos gobernos municipais anteriores, como ben dixo Marcos Andión, apostaron por pagar o “imposto reaccionario” a os medios de comunicación e todos fracasaron no propósito de conquerir con iso a alcaldía de Vigo. Cabería pensar que as cousas terían que cambiar. Por se fora necesario, adiantamos algunhas ideas.

A comunicación municipal debe ser concebida como un servizo municipal e a ela se lle deben aplicar tamén os principios de legalidade, eficacia e eficiencia na xestión. A publicidade, para promoción de concertos e actos culturais masivos, captación de patrocinio, ou promover puntualmente unha "adhesión" cívica. O resto, comunicación pura e simple, debería atender:

• Á información veraz e accesible sobre os acordos dos distintos órganos municipais.
• Á transmisión non encuberta da opinión do goberno e da oposición sobre os asuntos da cidade.
• Á información práctica para a vida cidadán.
• Á mellora do nivel cultural e educativo da poboación mediante o desenvolvemento dun traballo profesional sobre os distintos aspectos da cultura urbana contemporánea.
• Á difusión de anuncios e convocatorias.
• Ás realizacións non propagandeadas do Concello como institución, o relato profesional dos feitos.
• Á difusión das ordenanzas municipais e dos dereitos e deberes dos cidadáns.
• Ó acceso completo a toda a documentación municipal que non teña legalmente condición de secreta ou protexida pola normativa de protección de datos persoais.
• Á promoción do idioma e cultura de Galicia.

Como instrumento, un servizo profesionalizado, convenientemente dotado e sen comisariado político.
Os labores partidistas de información e publicidade, a cargo dos propios grupos municipais cós seus propios medios.
A defensa contra a manipulación informativa dos medios locais, xa non subvencionados, debería vir pola edición dun Medio informativo municipal en papel, coa periodicidade adecuada para ser eficaz, e tamén co uso extendido dos sistemas de información electrónico, coma é a extensión da rede wi-fi a tódolos vigueses.

O custo de tal proposta comunicativa, persoal incluído, non debera superar os 900.000 euros anuais, bastante menos do que hoxendía se gasta o Concello en lograr soamente un "bo trato" dalgúns medios locais.

Pois como estamos de consellos, cremos que en materia de comunicación municipal e publicidade institucional, no pacto de goberno debérase recoller os seguintes compromisos:

• Un protocolo de relación cós medios de comunicación, cun código de obrigado cumprimento para os socios de goberno.
• Transparencia nos gastos de publicidade municipal, cun rendemento periódico de contas aos cidadáns.
• Creación dun Servizo municipal de comunicación profesionalizado, para tódalas concellerías.
• Concebir a información, comunicación e publicidade institucional como un servizo aos cidadáns.
• Creación dunha imaxe corporativa única do Concello de Vigo.

Sabemos que todo isto é complexo, que require un gran esforzo de xenerosidade e consenso e que a súa posta en práctica requirirá múltiples axustes progresivos e conflictos. Pero tamén sabemos que a “tradicional política informativa” dos sucesivos gobernos en Vigo non reporta beneficio algún aos únicos beneficiarios lexítimos da actividade municipal: os cidadáns. Sabemos que debe rematar o cobro e pagamento do “imposto reaccionario”. Sabémolo e, de continuar, así denunciarémolo.

P.S. O comité Antichanchullos de Vigoblog insísteme en que reclame, neste punto, que o novo goberno cree unha comisión de investigación sobre o Convenio secreto para o financiamento dos actos municipais da Volvo Ocean Race, asinado entre Corina Porro e ING, e que aportou á caixa de empresas relacionadas coa súa xefa de Gabinete, Pilar Egea (Abano e Significantia), a cantidade de 677.625,60 euros (ou sexa, 112.747.413,08 pesetas das de antes), é dicir, o 44,5 % do total aportado pola multinacional holandesa.