Ruido

O tema do ruido e do dereito ao descanso nocturno en Vigo está cheo de mentiras municipais e accións de despiste. Outra volta veñen marear co de que van declarar "zonas saturadas" (¿para que? ¿porque nono incluíron no plan xeral? ¿non se blindan e supervalorizan os locais existentes?), o mesmo anuncio que fixeran xa hai máis de un ano.

A realidade, máis alá das ducias de páxinas adicadas nos periódicos a este tema, é que o Concello de Vigo nin atende convenientemente, nin controla, nin tramita máis ca unha parte das múltiples e reiteradas denuncias por ruido feitas por veciños que sofren, cada fin de semana, a imposibilidade de durmir polo ruido emitido por locais de copas e o botellón. Locais ilegais, tanto porque emiten ruido por riba dos límites admitidos polas ordenanzas e non están insonorizados, como porque parte deles carecen de licencia adecuada. E se son ilegais, procedementos hai abondo para pechalos e que se adecúen á lei. As poucas denuncias que tramita o concello, se aos feitos nos atemos, non deben ter relación directa coas zonas con maior problemática, como Churruca.
A realidade é que unha parte dos locais de copas desas zonas carecen de licencia adecuada. A realidade é que o Concello, poidendo facelo, non actúa pechando estes locais que carecen do permiso para exercer a actividade, con independencia de que emitan ou non ruido superior ao permitido. A realidade é que a Policía local non realiza todas as medicións que lles reclaman os afectados e que se acumulan centos de denuncias sen resposta axeitada. O certo é que os veciños afectados xa están fartos.

Mapa de ruidos, enésimo estudio de ruido (menudo choio este!), zonas saturadas, estudios do Valedor do cidadán (que está a actuar con clara incompatibilidade como enxeñeiro e como Valedor: Luis Espada adícase profesionalmente ao estudio deste tema o que non deixa de ser francamente mosqueante e incompatible), declaracións e demais, só ocultan conscientemente esta realidade: o Concello, poidendo facelo, non soluciona un grave problema que afecta gravemente á saúde dos cidadáns. Non sabemos por que non actúa eficazmente. Nin se nos ocorre pensar que teña que ver con quen é, e de onde vén, o concellal que acumula os dous cargos que teñen que ver directamente con este asunto, as delegacións de medio ambiente e urbanismo: José Manuel Figueroa, de profesión coñecida -antes da política, claro- hosteleiro menor. Tampouco podemos imaxinarnos nin de lonxe que a Policía local teña ningún interese en non actuar cando se demanda a súa presencia en determinadas zonas. Algunha outra razón haberá e alguén terá que investigala.
Parece que algúns veciños de Vila-real atoparon a solución ao seu problema nos tribunais e lograron unha dura condena de prisión e inhabilitación para o seu alcalde: se cadra, en Vigo, cunde o exemplo. Seméllame a única forma de que deixen de tomarnos o pelo e a saúde.

Ilustración: Forges en elpais.com
FOTO: vigoblog.blogspot.com