Un membro destacado do PP denuncia a C. Porro

Ubaldo Rivas Romero, segundo informa hoxe La Voz de Galicia, vén de denunciar a C. Porro por haber exercido sobre el presións para que informase "á carta" dende o seu posto como Titular da Asesoría Xurídica do Concello de Vigo.

Ubaldo Rivas, licenciado en Dereito e funcionario da Xunta, foi subdirector xeral de Patrimonio Histórico e Documental en 1993; en 1995 noméano membro da asesoría xurídica da Xunta e en 1998 subdirector xeral de Universidades, posto que ocupou ata que -perdidas as eleccións autonómicas- o PP e C.Porro decidiron colocalo como cargo de máxima confianza no Concello de Vigo, nun dos postos funcionariais máis importantes recollidos na lei de grandes cidades: titular da asesoría xurídica. Foi nomeado para este posto o 7 de decembro de 2004 a proposta de Porro. Rivas foi tamén candidato nas listas do PP por Santiago de Compostela nas últimas eleccións municipais .

Pois semella que se debeu producir un "abuso de confianza" ao pretender C.Porro "dictarlle" o sentido dos informes, supoñemos que amparándose na militancia común no PP. Polo que se ve, primou, desta volta, a profesionalidade sobre a "fidelidade" á alcaldesa.

Estas "desavinzas" levaron a que Ubaldo Rivas fora cesado fulminantemente pola Porro (foi notificado vía Boletín Oficial) o 30 de outubro de 2006, ao mesmo tempo que nomeaba ao seu substituto, outro home de confianza provinte da extinta Xunta do PP, Pablo Figueroa Dorrego, antigo secretario xeral da Consellería de Presidencia que, por certo, fora denunciado en 2005 pola CIG perante a ficalía por un presunto delito na filtración de exames nunha oposición da Xunta.

Non debe ser alleo este cese ao escandaloso ó "baile" de informes que deu lugar á revirada adxudicación do Auditorio de Casa Mar, do que dimos contada información e opinión en Vigoblog: "Firmones para el Auditorio", "Imaginación contable para el auditorio" e "Fuera inútiles del Ayuntamiento". Esa adxudicación a Caixanova xa deixou daquela polo camiño (tras a arrabalera descalificación a ese funcionario realizada por Chema Figueroa nun Pleno municipal) a un dos técnicos informantes, Alberto Tizón, que abandonou o Concello para reingresar no seu posto da Xunta de Galicia.

Con este novo affaire, C.Porro conságrase na súa especialidade de cesar a profesionais que non aprenden a atender ás súas "razóns". Primeiro foi o cese do xefe do departamento de Patrimonio histórico, logo dun informe negativo sobre o Plan xeral -despois ratificado polos informes negativos da propia Xunta do PP- e o traslado do técnico que figuraba como "candidato" de Ventura Pérez Mariño a xerente de urbanismo.
En pleno proceso da extraña tramitación dos expedientes de adxudicación do gindastre municipal, dos aparcamentos soterrados e do mobiliario urbano, foi cesado tamén o xefe da área de Seguridade e transportes, cuxos informes tampouco debían ser do gusto de Corina. Polo medio quedou Tizón e a "limpeza" alcanzou xa ata os membros declarados de "confianza" do seu propio partido, como Ubaldo Rivas, situado naquel sector popular do "birrete".

Pero a práctica de Porro eliminar obstáculos no seu camiño non se queda soamente en ceses expresos, senon tamén na máis sutil de concentrar de feito as competencias de xefaturas técnicas de área a favor de "supervisores" nomeados a dedo. É o caso de tódalas obras municipais, xardíns, saneamento, depuradora... que, ó parecer, son controladas de xeito absoluto por un enxeñeiro industrial, retradado día si e día tamén xunta a alcaldesa nas múltiples inauguracións e visitas de obra, en detrimento dos propios xefes de área, enxeñeiros de camiños, de montes e dos arquitectos municipais.

Naturalmente, o Faro de Vigo nunca nos conta nada... e, polo que se ve, La Voz obvia o feito de que Ubaldo Rivas é un destacado membro do PP.

Hai que deixar sitio para as flores.