Gamela coruxeira: desagravio

Só mentes cativas, incultas, desleigadas, xentes de ningures formadas nun abc estético entre o mesón típico e o Telva, deseñadores sobrevenidos de pacotilla, bestas, epítomes da autoxenreira, xentes de secano, desas que despois de nacer nunha orgullosa parroquia de Ourense, avergónzanse e falan con acento de madrí, pailáns sobrevenidas a concelleira, maestrillas autoritarias con ínfulas de grandeza, pobres homes e mulleres que xamais saberán o que é sentir o nordés na faciana navegando de bolina nunha embarcación que atesoura a esencia mariñeira dunha cidade desmemoriada e cativa, só mentes así poden ter a ignorancia abonda como para someter á noble gamela coruxeira á vergonza e ao aldraxe de servir de xardineira nun cutre laguiño xaponés. Alí onde aínda o cheiro a sardiña secular, a patela e a trainera, a botes xeiteiros, racús e galeóns de cabotaxe, pelexa contra a incuria dos piores e máis desagradecidos fillos de Vigo.


A Gamela coruxeira: poderán vostedes vélas aínda orgullosas na praia da Fontaíña ou na de Nerga, ollando ao norte coa testa ergueita por sabérense o producto máis elaborado de enxeñería naval , froito da sabiduría de xeneracións de carpinteiros de ribeira e mestres populares nas artes da pesca. Se teñen sorte, admirarán aínda algunha navegando a vela, se cadra dalgún dos membros da Asociación de Gameleiros que lideran dende o Breadouro; poderán, se cadra, véla la no Museo do Mar ou no do Pobo Galego.

Dende aquí desexamos que as Asociacións de defensa do Patrimonio, que a propia concelleira en Vigo desta materia, que as Asociacións de defensa do Patrimonio Marítimo de Galicia, a dirección do MUseo do Mar e o alumnado e profesorado da Escola Obradoiro Mar de Vigo, dependente do Concello, esixan a Isaura Abelairas, autora intelectual desa bazofia, e a Abel Caballero, que ostenta a competencia en tódalas áreas municipais, que devolva a súa dignidade ás tres embarcacións prostituídas e indecentemente exhibidas no que queda do Berbés.

Eu xuro que xa nunca máis pisarei ese Berbés aldraxado.

FOTOS: Asociación Mar de Pedra de Amigos das Gamelas