Botellón no problem

O botellón vén sendo un problema sentido en tódalas cidades españolas. Con independencia da valoración que sobre este fenómeno xuvenil se faga, é evidente que xera problemas cívicos e que a súa práctica produce unha colisión co dereito ao descanso. A preocupación exténdese tamén pola xeralización en determinados sectores sociais dunha socialización xuvenil cada vez máis marcada polo consumo de alcohol (e outras drogas ilegais, a cocaína con especial incidencia en Vigo). A obviedade deste feito provoca que as administracións locais de calquera signo traten, dun xeito ou doutro, de paliar ou de solucionar os efectos do botellón, reflexionen sobre as súas causas e se preocupen da saúde dos mozos que o practican cada semana.

A situación de Vigo é, unha volta máis, distinta. O problema soluciónao C.Porro, co seu mellor estilo: negándoo. Pode ser pura ignorancia ou que lle fixeron as contas e sáenlles que por cada veciño cabreado por non poder durmir ou por pasearse entre lixo, cristais rotos e impregnacións de licores variados, hai dous ou tres mozos maiores de 18 que poderían votar a unha alcaldesa "enrrollada", ou, polo menos, que non armen lío. E para vender que Vigo is diferent, nada mellor que utilizar de novo ao Faro de Vigo, ao estilo de quen paga manda. Mentres que o Faro faise eco das alegres opinións de C.Porro sobre este tema, segundo as cales en Vigo no problem, no mesmo día, La Voz contradíceas coa opinión dos veciños cabreados.

A política municipal de propaganda, maquillaxe e relacións públicas promovida polo gabinete de Corina, consiste xustamente en non facer nada perante os problemas reais -ocuparse deles é un labor normalmente incompatible co marketing- e mercar, cos cartos de todos, imaxe no mercadeo dos Medios de comunicación locais.

E se vale todo, ninguén pode logo se escandalizarse de que haxa quen considere que, igoal que estrela cada fin de semana botellas contra o chan sen que ninguén lle afee o xesto, ten dereito tamén a cargarse as cutres figuriñas de poliuretano do Belén da Alameda. Máis se son burdos monicreques difrazados de romanos ao coidado das camelias da praza de Compostela.

Actualización 12.11.2006 O Valedor do Pobo estima que Porro non combate o ruido do botellón.