Xesús Paz

A lectura da entrevista de hoxe no Faro de Vigo a Xesús Paz, novo presidente da Autoridade Portuaria de Vigo -a pesar do tocapelotismo barateiro do inefable entrevistador made in Faro Chema García- confirma as nosas esperanzas. É todo un notición que alguén con responsabilidade nesta cidade fale con prudencia, propiedade e coñecemento de causa e non pareza simplesmentes un vendedor. Se ademais algo disto cambia tamén no Concello, se cadra, ata temos sorte e Vigo comeza a parecerse a unha cidade normal.

Suso Paz xa viña precedido dun significativo respecto e apoio polo seu labor no porto de Vilagarcía. Contan os de alá que o seu nomeamento para a presidencia da Autoridade Portuaria de Vigo vivíuse como unha importante perda para a localidade Arousana. Un perfil técnico e directivo claro, experiencia na administración pública (tamén traballou na súa primeira época laboral no Concello de Vigo, como técnico temporal na área de Urbanismo e en labores de planificación) e unha formación universitaria en socioloxía que lle permite formular ben as preguntas e atopar respostas axeitadas na complexidade do mundo globalizado no que nos movemos. Se a iso unimos unha boa capacidade para as relacións persoais e o consenso, tal vez poidamos pensar que, a curto prazo, a variada caste de opinadores que en Vigo se agrupan ao redor da autodenominación axentes sociais, calen a boquiña e escoiten.