Mínimos

Mentres se vai polas fendas a auga potable e polos tubos de saneamento viaxan sen control toneladas de resíduos altamente contaminantes; mentres Vigo mantén o índice máis baixo da comunidade en número de bibliotecas públicas e non existe o máis mínimo mantemento urbano, incluídos os investimentos millonarios (agás para as flores de C. Porro); cando se manteñen uns servicios sociais de cara á galería, mentres non se asegura tan sequera un lugar decente onde durmir ou comer aos excluídos da cidade; á vez que miles de cativos de 0-3 anos carecen dunha praza pública nunha escola infantil, nos momentos máis importantes da súa formación e socialización e os mozos non temos posibilidade de acceder a unha vivenda digna porque o Concello non é quen de ter unha política de vivenda acorde coas necesidades da cidade; mentres que o Casco Vello e o patrimonio da cidade abandóase á sorte da especulación sen a actuación decidida da administración; mentres os mínimos de saúde, saneamento, educación e cultura non están nin polo forro satisfeitos, os nosos gobernantes coa complicidade do BNG, adícanse a dar retoques de pintura ás parroquias e a dar de comer obscenamente ao podercillo caciquil da Federación de Asociacións de Veciños. Menos Plan de Parroquias e zarandajas polo estilo, e máis políticas decididas, claras e transparentes que afronten os problemas reais desta maltratada cidade... que ao parecer, cartos non faltan.