As obras do Casco Vello incumpren o PEPRI

Trabuca as súas críticas o PP sobre as obras do Casco Vello. O problema non é se desaparecen pedras ou non, ou se o granito o cór é gris alba en lugar do tradicional rústico (que si o é, pero só é achacable á zafiedade e falta de profesionalidade dos redactores dos proxectos). O grave e irregular é que se teñen saltado por completo o que dispón, no que respecta ás actuacións en espazo público, o PEPRI (Plan Especial de Protección e Reforma Interior do Casco Vello). Un planeamento aprobado definitivamente no ano 2006 despois de varios anos de tramitación, redactado por encargo do goberno municipal presidido por Pérez Castrillo a Consultora Galega, empresa con grandes afinidades co BNG (Daniel Pino, o seu director pasou a ser o Director xeral do IGVS co bipartito) e que xestiona tamén a Oficina de Rehabilitación municipal.
O desprezo pola normativa, polas prioridades e directrices marcadas polo PEPRI para o espazo público do barrio histórico é escandaloso. O PEPRI define, cun alto grao de concreción plasmado en planos xerais e específicos para cada zona, as actuacións que deben executarse bos seguinte oito anos e a estimación do custo de execución. Non embargantes, o bi-gobenro BNG, reinventa o PEPRI ao seu antoxo, con proxectos elaborados en dous meses, pasando olimpicamente do que estaba obrigado a cumprir e, para máis inri, executando con nulo criterio arquitectónico, dirección técnica inaxeitada e mala realización final.
Para mostra do que dicimos e xa dixemos, algúns exemplos nas obras que se están a executar no barrio histórico de Vigo con cargo ao millonario Fondo Estatal de Invesrsión Local:

- Execútanse obras non previstas no plan de de actuacións no Espazo Público do PEPRI (isto é, que o equipo redactor consideraba non necesarias a medio prazo) como : Praza da Princesa, Rúa San Bernardo e Xoanelo, A Pedra, Rúa Ferrería, Rúa Ballesta, rúa Poboadores (tramo dende o Paseo de Alfonso ata rúa San Francisco), Rúa Joaquín Yáñez, Paseo de Alfonso (cunha actuación que nada ten que ver coa comedida proposta no PEPRI)... son espazos que non precisaban ningunha actuación por estaren en boas condicións e, a maioría deles, recentemente rehabilitados.
- Non embargantes, non se actúa sobre espazos considerados prioritarios no PEPRI: Rúas Sta. Marta e Llorente, Miradoiro de Poboadores, Rúas Falperra e Cahamuíña, Rúa e Xardins de Celso emilio Ferreiro, Travesías entre a Praza do Rei e Rúa Santiago, Contorno non urbanizado do Convento de San Francisco, Praza do Rei e Contorno...
- Altéranse, pavimentos que o PEPRI considera protexidos: desaparición da chapacuña de Ferrería, dos lastros de Poboadores e de Abeleira Menéndez... substituíndoos por lousas de granito regulares. Ignóranse así os "criterios regularizadores" recollidos no Proxecto de normalización de elementos do espazo urbano do Casco Vello", tal e como se indica na páxina 79 da normativa urbanística do PEPRI.
- Desprézanse as indicacións referidas ao deseño de pavimentos, tanto no referido á colocación dos rexistros (tapas) -absolutamente caótica- como na execución das rúas peonís ao non diferenciar as zonas de maior resgardo para os peóns co trazado do pavimento, producindo un continuo formal en toda a calzada que vén morrer directamente nas fachadas da edificación;
- Altéranse gravemente espazos catalogados, como a praza da Princesa, desprezando as valoracións contidas na ficha de protección do PEPRI, que literalmente di: "O proxecto de Franco Rabuñal, Pintos Santiago e Toucedo Rodríguez (inscrito no programa Urban), constitúe unha das máis acertadas actuacións recentes. A devandita intervención unificou e ordenou a disposición do mobiliario urbano, así como propuxo a renovación do enlousado de granito e a plantación de arborado de desenvovemento vertical arrodeando a fonte. É salientable o uso do báculo tipo lanterna, o banco empregado (cun bo sistema de fixación) ou o deseño da marquesiña, xa que constitúen reeleboracións de elementos hoxe tradicionais nunha lingoaxe contemporánea que permiten unha inserción harmoniosa sen provocar confusión na lectura histórica do conxunto e das intervencións realizadas. Para finalizar sinalar o esforzo realizado na ocultación das tapas de reistro baixo o enlousado de perpiaño".
Compárese isto coa actuación que se executa nesta zona con cargo ao Plan E: eliminación da marquesiña, confusión entre calzada e beirarrúa, eliminación dos bancos existentes, cambio das luminarias lanterna por novos báculos de dubidoso gusto, recolocación das tapas de rexistro en superficie...

Estamos diante dun considerable fraude e malgasto de fondos públicos. ¿Que puido ocurrir para que as directrices, prioridades, planos, catálogos e normas aprobadas en 2006, elaboradas por un equipo especializado durante case cinco anos, tras os correspondentes e caros estudos técnicos e reflexións urbanísticas e socioeconómicos, se cambiasen por proxectos elaborados precipitadamente en menos de 2 meses para aproveitar os fondos estatais do Plan E?
¿Por que razón o bi-goberno BNG ignora, despreza e se salta as normas de obrigado cumprimento do PEPRI? ¿Por que levanta rúas e prazas recentemente rehabilitadas e que non constan en ningún dos programas de prioridades a oito anos previstos no PEPRI e, sen embargo, deixa de executar outras que o Plan considera necesarias?

Non sei se eles o saben: nós sí.