Finca do Conde: o requirimento da Xunta de 1999

Os fundamentos xurídicos da Resolución da Dirección Xeral de Urbanismo da Xunta de Galicia de febreiro de 1999, sobre o PERI III-02 Finca do Conde:

CONSELLO DA XERENCIA DE URBANISMO
SESIÓN EXTRAORDINARIA DO DÍA 23 DE MARZO DE 1999

Na sala de sesións da Casa do Concello de Vigo, cando son as 9,00 horas do día devandito, en primeira convocatoria e en sesión extraordinaria, reúnese o Consello da Xerencia de Urbanismo para o estudio, dictame e resolución, no seu caso, dos asuntos incluídos na orde do día remitida a tódolos compoñentes do Consello e á que asisten o seu presidente, D. Manuel Pérez Álvarez (alcalde), os vocais, D. José Avelino Fernández Fernández, D. José Antonio Gil Sotres, D. José Ramón Montero Escrigas, D. Lois Pérez Castrillo e Dª Dolores Villarino Santiago. Están presentes, ademais, o xerente de Urbanismo, D. Alfredo Cerezales Fernández e a interventora xeral do Concello, Dª Berta Guarner González. Actúa como secretario D. Francisco Javier García Martínez, secretario da Xerencia Municipal de Urbanismo.

ASUNTO ÚNICO:

REQUERIMENTO DA DIRECCIÓN XERAL DE URBANISMO SOBRE O PERI III-02 FINCA DO CONDE

"Requirir ó Concello de Vigo para que, no prazo de un mes, proceda a declarar anulado o acordo adoptado polo Pleno da Corporación en sesión do 16 de abril de 1998, polo que se aprobou o Plan Especial de Protección e Reforma Interior III-02 Finca do Conde, así como a de tódolos acordos posteriores que traian causa de éste, por ser contrarios ó ordenamento xurídico.
No caso de non ser atendido o presente requerimento esta Consellería poderá adoptar ou insta-las medidas legais oportunas para o pleno restablecemento da legalidade urbanística vulnerada"

...)

Fundamentos xurídicos:
1º.- o PEPRI III-02 Finca do Conde, non cumpre, nos seus xustos termos, tódalas observacións indicadas nos informes vinculantes emitidos pola Delegación Provincial desta Consellería en datas 1 de outubro de 1997 e 9 de marzo de 1998, específicamente as relativas ó incumprimento do uso característico residencial e de reserva mínima de zonas verdes e espacios libres. O incumprimento do informe autonómico vinculante é causa de nulidade de pleno dereito que determina o art. 62.1.e) da Lei 30/1992 de 26 de novembro, de réxime xurídico das administracións públicas e do procedemento administrativo común.

2º. O Plan Especial aprobado definitivamente non se axusta ás determinacións do PXOU que desenvolve dado que altera o uso característico residencial a prol do uso terciario, e non prevé a reserva mínima de 16.180 m2 de zona verde a que obriga a correspondente ficha do Plan Especial vixente.
A Lei 1/1997, do 24 de marzo, do solo de Galicia no seu artigo 11.1.b) establece que o Plan Xeral deberá establecer para os sectores de solo urbano remitidas a planeamento especial, os usos globais, niveis de intensidade, estándares e densidade que no solo non consolidado non poderá ser superior a 100 vivendas por hectárea cunha superficie edificada máxima de 8.250 m2.

O Plan Xeral vixente aínda que foi aprobado definitivamente ó abeiro da lexislación entón vixente, contén unha ficha específica na que recolle, entroutras determinacións, os usos e intensidades e os estándares para dotacións de zonas verdes ós que se deberá axusta-lo Plan Especial.

O Plan Especial está obrigado a respectar e axustarse a estas determinacións (art. 26.2, 45.2 e 50 da Lei 1/1997 de 24 de marzo, do solo de Galicia), o seu incumprimento determina a nulidade de pleno dereito do Plan Especial, segundo dispón o art. 62.2. da Lei 30/1992 de 26 de novembro de réxime xurídico das administracións públicas e do procedemento administrativo común.

3º.- O uso característico fixado polo Plan Xeral é o residencial en tanto que da ordenación contida no Plan Especial podería resultar como uso predominante o terciario. Esta desnaturalización do uso característico residencial é consecuencia de non computa-la superficie construible con destino a uso terciario en determinadas condicións. Nembargantes, unha cousa é o cómputo da edificabilidade máxima permitida e outra ben diferente o cambio do uso característico ou predominante fixado polo Plan Xeral que non pode ser alterado fraudulentamente co argumento de que o uso terciario en semisoto non computa edificabilidade; a superficie construible con destino a uso terciario resultaría moi superior á destinada para uso residencial, por canto que a prevista no cadro resume de ordenación B.9, hai que engadirlle a superficie construible en semisoto que se permite sen outro límite que o de que o plano inferior do forxado que cubra a edificación non sobrepase 1,50 m sobre o nivel da rasante oficial, convirtindo deste xeito o uso terciario en uso predominante do sector.
4º.- O Plan Xeral fixa unha reserva mínima de 16.180 m2 de superficie destinada a zona verde que non se acada na ordenación prevista polo Plan Especial, dádo que, a estes efectos, non poden ser computados aqueles espacios libres que non son adecuados coa natureza e función propia dunha zona verde pública ( arts. 3.1.f) e 11.1.b) da Lei 1/1997, do 24 de marzo, do solo de Galicia e sentencias do Tribunal Supremo de 16/2/1987), nin cumpren as condicións establecidas polo art. 4 do anexo do Regulamento de planeamento. En consecuencia, non son computables para os efectos da reserva mínima de zonas verdes nin o xardín do Pazo do Conde, que é titularidade e uso privado; nin os espacios residuais, fragmentados e intersticiais ó viario, con pedentes superiores ó 10% que é o límite fixado pola Lei 8/1997, de 20 de agosto; nin os espacios libres de titularidade privada situados sobre a edificación de uso terciario.
5º.- A Lei 1/1997, do 24 de marzo, do solo de Galicia, no seu art. 48 condiciona a eficacia do acto de aprobación definitiva e á entrada en vigor do plan aprobado ó cumprimento previo de determinadas condicións de publicidade e traslado do expediente completo e dous exemplares do plan aprobado definitivamente "con tódolos planos e documentos que integran o plan sobre os que tivera recaído o acordo de aprobación definitiva, debidamente dilixenciados polo secretario do Concello, facendo consta-lo dito extremo"; o que non se cumpríu no caso do citado Plan Especial e motivou a reclamación da documentación polo delegado provincial desta Consellería que non foi atendida polo Concello.
6º.- En consecuencia, o Plan Especial infrinxe ó ordenamento vixente, por canto non cumpríu os informes preceptivos e vinculantes desta Consellería, non se axusta ás determinacións de uso e reservas mínimas para zonas verdes esixidas polo vixente Plan Xeral e non pode considerarse en vigor por non ter cumprido os requisitos establecidos polo art. 48 da Lei do solo de Galicia."

(...) [informes técnicos municipais contrarios ao requirimento da Xunta] (...)

Proposta.-
O Consello, en uso das atribucións conferidas polo artigo 8.m) dos estatutos da Xerencia, por maioría, (cos votos a favor do PP, Sres. Fernández Fernández, Gil Sotres, Montero Escrigas e Pérez Álvarez, e en contra do PSdeG-PSOE, Sra. Villarino Santiago, e do BNG, Sr. Pérez Castrillo) propón a adopción do seguinte acordo:

Rexeita-lo requerimento formulado polo director xeral de Urbanismo o día 26.02.99 para que se anule o acordo plenario do 16.04.98 sobre aprobación definitiva do PEPRI III-02 “Finca do Conde”.

DENDE VIGOBLOG SEGUIMOS INFORMANDO, xa que os que teñen esa obriga nono o fan, pero nos regalan fantásticas exclusivas de ocorrencias para seguir ocupando a lámina de auga e seguir soslaiando a lexislación de protección do litoral.

Non só nos desinforman algúns medios de comunicación: Figueroa segue intentándoo. A mentira non é unha opción política.