Finca do Conde: que paguen Corina, Figueroa e Toba

Aínda que o Faro o silencia, como corresponde a un medio subvencionado polo goberno municipal, La Voz e El País, recólleno de xeito destacado: como era de esperar, tras as reiteradas sentencias anteriores do Tribunal Superior de Xustiza de Galicia, o Tribunal Supremo vén de anular a totalidade do PERI Finca do Conde, e, en consecuencia, sitúa na ilegalidade as sentencias concedidas por Corina Porro (coa inestimable axuda do BNG de Toba Girón) ao Centro Comercial -hoxe Carrefour- e ás torres de vivendas xa construídas.

As advertencias sobre esta debacle, foron reiteradamente realizadas por Ventura Pérez Mariño e por Mauricio Ruíz en cantas ocasións tiveron, e foron sistematica e conscientemente ignoradas, pesie á súa evidente consistencia, por PP e BNG. Xa o recordabamos nun noso post de xullo de 2005, no que relatabamos o proceso de acoso e derribo de Ventura Pérez Mariño:

- Xullo, consello da Xerencia sobre as licencias no PERI Finca do Conde. O PSOE propón unha fórmula para evitar que a continuidade das licencias (despois de tres sentencias que anulan o PERI aprobado por Manuel Pérez) supoña un grave prexuízo futuro para ó Concello pola posibilidade de que se produzan indemnizacións multimillonarias no caso de que se fagan firmes as sentencias e se anulen xudicialmente as licencias concedidas. O voto en contra do PP e a abstención do BNG, impiden que a proposta saia adiante. APROIN presenta un recurso de reposición contra este acordo (que se verá en outubro, con nova abstención do BNG que provoca que as licencias continúen o seu curso). Mauricio Ruiz, concelleiro de urbanismo (PSOE) manifesta non comprender a postura do BNG que lle parece incoherente co que debera ser unha postura unitaria do goberno (o BNG tíñase manifestado reiteradamente contra a operación do PP-Finca do Conde). Xabier Toba (BNG) explica a súa abstención en que "é un asunto complexo".

Ocorreu o que tiña que ocorrer. As decisións tomáronse coa advertencia expresa das graves consecuencias dos actos administrativos aprobados polo PP coa abstención activa do BNG. Non debemos ser os cidadáns os que paguemos a irresponsabilidade (os intereses?) dos concretos concelleiros que, advertidos, votaron contra os intereses xerais da cidade: toca agora que sexan eles os que asuman o pagamento das indemnizacións ás que poida haber lugar ou as responsabilidades civís que se deriven.