Non á demolición do Mercado do Bolhao

Ós que amamos Porto non só pola súa marabillosa monumentalidade senon, sobre todo, pola súa pervivencia como cidade viva, cun activo comercio tradicional, non podemos menos que traer a estas páxinas a denuncia contra o proxecto de demolición do histórico e tradicional Mercado do Bolhao, que, se non se evita coa mobilización popular, será aprobado definitivamente dentro duns días.
Este sábado poidemos estar xunta cos nosos amigos portugueses na concentración e recollida de sinaturas contra o proxecto da multinacional holandesa TramCorNe-Promoções e Projectos Imobiliários (outra vez unha inmobiliaria holandesesa untando cos seus megaproxectos!) de crear outro centro comercial sobre as ruinas dos postos de productos tradicionais e o incríble atractivo do mercado actual, a pesar do lamentable estado de abandono que sofre.

Unha vez máis, tanto ten Galicia ou Portugal, Porto ou Vigo, quérese impoñer a forza do diñeiro fronte á racionalidade e a conservación do patrimonio herdado. Unha vez máis, o proxecto de rehabilitación encargado e premiado polo Concello de Porto en 1999 redactado polo estudio Joaquim Massena Arquitectos, que incidía na conservación e revitalización dos valores patrimoniais e sociais do Bolhao, é substituído, sen máis razón có diñeiro, por un proxecto especulativo que tenta gañar, a costa do patrimonio monumental, a máxima edificabilidade para o seu negocio.

Outra vez -como xa fixeran hai anos para salvar o Coliseum de Porto- os portuenses mobilízanse e piden o apoio de turistas e visitantes para salvar o tesouro da rapiña das multinacionais e dos intereses particulares dos corporativos. Agora pídenos que escribamos, opoñéndonos ao proxecto de demolición e defendendo a rehabilitación integral do Mercado tradicional, a:

Presidente da Cámara Municipal do POrto
Rui Rio
Praça General Humberto Delgado
4049-001 Porto-Portugal
ou enviando un correo electrónico a geral@cm-porto.pt

Sinaturas en liña aquí
Máis información aquí

Video