O edificio de Cluny, para a Biblioteca Estatal en Vigo

Finalmente parece que o Ministerio de Cultura vai crear e construir a Biblioteca do Estado en Vigo. Dende Vigoblog queremos contribuir a que tal decisión non prolongue a súa resolución anos e anos, e propoñemos unha ubicación viable e, crémos, idónea, para este equipamento cultural público: o edificio do antigo Colexio Cluny, na Gran Vía de Vigo.

As razóns desta proposta son, entre outras:

• A rapidez coa que é posible logralo, habida conta da súa situación urbanística, da que logo falaremos;
• A súa ubicación céntrica e ben comunicada
• A posibilidade de conservar un edificio catalogado, de valor histórico, mediante a súa rehabilitación e adaptación aos usos de Biblioteca;
• O freo á operación especulativa que dende o ano 1998 se pretende consumar nesa céntrica parcela, hoxe propiedade da empresa de Valeri Karpin.
• O mantemento do uso público dotacional da parcela, tal e como actualmente se atopa no planeamento vixente e (aínda que de xeito conscientemente ambiguo) no documento do PXOM en tramitación.
• O limitado valor urbanístico que en conecuencia ten co grao de catalogación e usos admitidos actuais, ao non ser admitidos polo Concello no ano 2003 o convenio urbanístico do 98 (Manolo Pérez) nin a reforma deste na nova proposta de convenio de maio de 2003 (Xabier Toba).

Crémos que é unha opción inmediata, viable legal, económica e tecnicamente. Esperamos que as razóns para rexeitala non veñan das presións de Karpin, que adquiríu a parcela coñecendo sobradamente as condicións urbanísticas actuais que non permiten a derriba do edificio nin máis uso có de equipamento.

-------------------------------------------------------------------------------------------
A pequena historia urbanística do Colexio Cluny en Gran Vía:

Xa nos anos 70, coa aprobación da Lei Xeral de Educación, o Concello de Vigo tentou evitar unha previsible fuxida dos colexios situados no centro urbano de Vigo, animados pola posibilidade de dar o pelotazo coas súas parcelas e montarse no extraradio. Daquela o Concello aprobou o denominado Plan Especial de Equipamento Escolar, que limitaba esta posibilidade e que evitou en certa medida a desbandada xeral.
Sen embargo, no ano 1998 e coa coartada da adaptación á LOXSE, Cluny se prepara para a venda e para instalarse en 2.000 nun edificio de nova planta na rúa Carballo. Para posibilitar a operación de venda, Manuel Pérez asina coas relixiosas un convenio coa exclusiva finalidade real de que a congregación poida financiar e facer fronte ós gastos e custos que se derivan da construcción das novas instalacións.

O 29 de decembro de 2000, a Congregación transmitíu a “Inversiones Canaima, S.L.” os seus inmobles na rúa Gran Vía núm. 12 a cambio das obras executadas do novo edificio escolar e da cantidade previamente estipulada.
Os novos propietarios, en maio de 2003, fan unha proposta de novo convenio a Xabier Toba, Daniel Pino e Xabier Rivas, para a súa inclusión no novo Plan Xeral en tramitación, no que se mantén a posibilidade de solo urbanizable lucrativo, se ben se melloran as cesións públicas respecto do convneio anterior.

No mes de outubro 2003 trátase no Consello da Xerencia de Urbanismo, baixo a presidencia de Ventura Pérez Mariño, unha reclamación dos actuais propietarios da parcela do Colexio Cluny. A proposta do PSOE é non dar por válido o convenio asinado por Manuel Pérez nin a proposta da promotora de novo convenio de 5 de maio de 2003, recollida inicialmente polos redactores do PXOM (Consultora Galega) e a promotora (Xabier Toba concelleiro de Urbanismo). Esta proposta impide de feito as pretensións indemnizatorias da promotora e abre unha posibilidade real de manter a edificación do colexio actual e o seu uso dotacional público. A impecable fundamentación xurídica da proposta, fai que se aprobe por unanimidade e se manteña o seu uso educativo. No PXOM en tramitación consta como "uso dotacional", sen especificar cal.
Pode consultarse a acta completa desta sesión da Xerencia de Urbanismo aquí (pax. 7 da acta).

En xuño de 2006, Inversiones Canaima vende a Valery Karpin o edifico e parcela. O ex-futbolista pretende que se inclúa no Plan Especial do Ensanche unha proposta urbanística nova, da que non dá detalles. A redacción deste Plan Especial foi contratada polo Concello á sempiterna Consultora Galega e leva xa máis de dous anos de retraso na súa entrega.

Estamos hoxe, pois, urbanisticamente, diante dun edificio catalogado e calificado como para uso público de equipamento escolar. Agora quedaría por diante unha boa negociación coa propiedade, a adquisición do edificio, a redacción do proxecto de rehabilitación e a construcción e inauguración da nova Biblioteca.

Queda tamén e sobre todo, a planificación necesaria dunha rede municipal de bibliotecas que afronte dunha vez por todas o desértico panorama bibliotecario actual na nosa cidade.

FOTO: Javier Albertos. Vigoenfotos.

ACTUALIZACIÓN 12.08.07

Segundo informa hoxe o Faro de Vigo, outra vez en exclusiva, Abel Caballero manexaría "Cluny o el antiguo rectorado como ubicación de la futura biblioteca estatal". Descoñecemos se tal nova sae realmente da alcaldía ou é o Faro mesmo quen, despois de lér a nosa proposta (démoslle conta por correo electrónico, onte á mañán, do noso post publicado o venres), aposta por ela. En calquera caso, parabéns, de ser certo, ao alcalde porque crémos sinceiramente que é unha magnífica ubicación. Dubidamos, sen embargo, que o antigo reitorado poida albergar en boas condicións estas instalacións.