Terrorismo ou simplificación?

Escoito a Suso de Toro pola radio. Desde a indignación arríscase asegurando a existencia dunha trama con organización, con loxística. Os datos que manexa: o número, a cercanía ás cidades, ás carreteras, ós aeroportos. Mesmo critica destemplado á ministra Narbona.
Leo os periódicos. Os investigadores policiais despois de 20 detencións din que é o de sempre e un pouco máis. Os ecoloxistas insisten nas causas estructurais. Na Sociedade Galega de Historia Natural recordan que houbo outros anos con picos de 200 incendios diarios.

Xogan forte os defensores da teoría da conspiración. Usan unha linguaxe que sona mal coma Bush. Un inimigo terrible, sen identificar, que nos ataca porque somos distintos, porque están co pasado. Algúns forofos denuncian abertamente ó PP. Seguen o exemplo de Acebes que non dubida cando identifica a Zapatero con ETA.

Levamos anos de incendios. Sempre se falou de terrorismo e de conspiración. Algúns chegaron a acusar ó BNG. Nunca se demostrou. Polo seu ben, e polo noso, ogallá leven razón gobernantes e intelectuais e o poidan demostrar. Pero é demasiado fácil para ser certo.