Dona Lola ten algo que decir. Nos tamén.

Unha instancia comunitaria ven de subliñar a gravidade dun problema que, coa connivencia da administración local e autonómica, ven sendo agachado desde hai décadas. As deficiencias na xestión do saneamento coa conseguinte contaminación da ría é o maior problema de saúde pública da área metropolitana de Vigo. Cada vez son máis e máis frecuentes os efectos dunha política que seguindo a máxima do alcalde Portanet négase a "enterrar millóns" en infraestructuras básicas e opta por operacións de embelecemento e maquillaxe.
A presenza de metais pesados, as emisións continuas de augas residuais, o patético funcionamento dos colectores, a case completa falla de control dos verquidos industriais, xuntanse cos incumplementos reiterados das autoridades locais que "non saben cales son os fallos da depuradora" pesia ter realizado auditoría tras auditoría e investido unha chea de euros en modificacións.
O Sr. Figueroa, concelleiro tamén de Medio ambiente, declarou solemnemente en sesión plenaria, a intención de chegar ata o final na busca de responsabilidades técnicas e políticas. Intelixentemente implicou a tódolos membros da corporación porque é sabedor das responsabilidades que, un tras outro, tiveron no goberno da cidade. ¿Sera por iso que non son quen de constituir unha comisión de investigación?
D. Lola Villarino, nunha intervención inusual para unha presidenta de Parlamento, deixou caer no debate sobre a depuración das augas en Galicia, que sobre o caso de Vigo ela "tería algo que decir". Estamos ansiosos por escoitala, a ela, a Figueroa, a Amador Fernández, a Mª Xosé Porteiro, a Manuel Soto, ós técnicos de Novotec, ós de SeraguaAqualia , ós do departamento de Medio Ambiente, ós do Parking de Urzaiz , a dirección das obras de humanización...Todos teñen algo que decir ós cidadáns e deben decilo. Trátase da maior agresión a nosa saude e a do medio. Non é un problema de moluscos e depuradoras. Vai de outra especie, parasitaria do poder e cunha alta capacidade camaleónica.
Seguiremos informando.