Méndez Gayoso for President

Seguindo as sabias reflexións de Andión arredor da economía política, pero seguindo o pragmatismo que tamén debe guiar os nosos pasos nesta época de crise cíclica ( como o San Froilán pero cada 16 anos) imos anunciar o plan B que manexan as auténticas fontes do poder nesta terra.
Lonxe das medidas trapalleiras acordadas polas autoridades europeas, especie de socialismo vergoñento con toques de populismo terceiromundista, o plan B galego consiste na redefinición institucional do estado autónomico de acordo co seguinte proceso:
1. Fusión de Caixanova e Caixagalicia para formar o que será Banco Nacional. Zapatero non quixo decilo pero algo sabe. Quintana leva dias falando do asunto.
2. Absorción pola Obra Social da Consellería de Cultura e Deportes. A Consellería non pode competir coa desbordante actividade despregada polas Caixas. Por outro lado, estas aportarían a propiedade do R.C. Celta que se convertería de seguido e unha vez saneado, na selección.
3. Incorporación da Consellería de Fomento ó Consello de Administración da Supercaixa arrebatando na mesma operación a autopista a estes americanos do Citigroup que non teñen liquidez.
4. Externalización da xestión da carteira industrial da supercaixa mediante un contrato co que hoxe son as consellerías de Industria, Medio Rural e Traballo. O contrato adxudicaríase mediante concurso público dirixido, tipo enerxía eólica.
5. Manter como público o Sergas para non apandar co deficit.
6. Cambiar o nome de R, por Caixa-Telefónica
7. O Parlamento seguiría coma órgano consultivo e podería nomear o 38% dos membros do Consello de asdministración da supercaixa.
8. Anulación das eleccións de marzo e nomeamento de Mendez Gayoso como presidente para visualizar o poder real.

Parece difícil de entender pero é o que hai.