Eventos para unha crise

Cos fastos da Volvo, C. Porro organizou (co chanchullo do convenio con ING) unha carreiriña de Powerboat. Daquela pagouselle á empresa privada que vai vendendo este invento (BOAT GP WORLD S.L.), a cantidade de 270.000 euros, o custo da elección de Vigo como un dos lugares de desenvolvemento da proba en 2005. Daquela, tamén a Xunta de Galicia decidíu exprimir os cartos dos contribuíntes e trouxo a Vigo outra megaregatiña desas que venden por aí, e pagou 360.000 euros por que viñera a Vigo outro acontecemento mundial (aínda que vostede, lector, nono saiba), o Campionato do Mundo Multicascos.
O tenente Domínguez, nunha nova demostración empírica de que o poder homologa a calquera formación política, decidíu traer a Vigo outro acontecemento sinigoal que colocará, por enésima vez, da mesma maneira cós anteriores, a Vigo no mapa. Esta vez o vendedor é distinto do que lle colocou a carreira a C. Porro. Se en 2005 era Boat GP, en 2008 será Powerboat P1. Daquela patrocinou e pagou os case 50 millóns de pesetas das de antes, unha empresa privada, ING Real State, con intereses inmobiliarios en Vigo. Desta volta, e á vista dos patrocinadores oficiais, serán os presupostos municipais (sección bigoberno BNG) os que pagaremos ao promotor deste evento comercial disfrazado de "deporte" (!) os posiblemente máis de 300.000 euros que custará traer este ruidoso cirquiño á nosa maltratada ría.
O Campionato do Mundo de Powerboat P1 é un deses productos comerciais que se levan a aqueles sitios que están dispostos a pagar a millonaria taxa correspondente, e que os espabilaos dos gobernantes venden á poboación, aínda por riba, como unha "alta xestión", en dura competencia con outras cidades, co sacro fin de colocar Vigo no mapa. Máis da mesma trapallada, pero para algúns moi proveitosa: o custo real do invento do tenente Domínguez será moi superior ao custo da taxa que cobrará o escuro empresario promotor. Polo medio hai todo un paquete de publicitación do invento (podemos ver estes días mupis, lonas e autobuses con publicidade a todo trapo), que costará moitos miles de euros e que irán a parar ás axencias de publicidade e medios de comunicación de sempre. E, de paso, poderemos poñer no noso album dos horrores, outra carísima foto de Santi, vai ti a saber, igoal emulando ao noso almirante Caballero sobre o avión -el non vai ser menos-, montado sobre os centos de cabalos dun boat en plan Stephano Casigari de andar por casa.

A proposta de Vigoblog

En novembro do ano pasado xa comentabamos a ocorrencia do tenente Domínguez de estudiar traer a Vigo o choio este do Powerboat, e titulabámolo "Máis traineras, menos boats, please". Nesta mesma liña, hoxe Vigoblog propón que o diñeiro que se lle vai dar a unha empresa privada por enchernos a Ría de máis ruído e contaminación, se empregue, por exemplo, en mercar -antes de que o faga alguén de fóra de Galicia- o vapor de bandeira viguesa Hidria II, que acaban de poñer á venda os seus admirables propietarios, incapaces de soster cos seus medios este importantísimo elemento do noso patrimonio marítimo, rescatado por eles hai algúns anos cun meritorio esforzo e ilusión.
Se coa PowerboatP1 só quedará na ría gasolina queimada en tempos de crise e máis ruido contra a nosa manda de arroases vigueses, a merca do Hidria II deixaría en Vigo para sempre un barco institucional de alto valor patrimonial e útil uso turístico, cultural e educativo. E restañaríase así a ferida que se producíu cando, pola incuria institucional, se desguazou para sempre o compañeiro inseparable do Hidria na ría de Vigo, unha xoia náutica, o alxibe a vapor, construido en 1905, Roberto, que ata o ano 1996 estivo activo no subministro de buques no noso porto, e foi vergonzosamente desguazado despois, sen que ninguén fixese nada por impedilo.