Sintese ou chapuza: que asinaron?

O Presidente da Xunta asinou co Presidente da Zona Franca un protocolo en presencia da Presidenta da Corporación e da Presidenta do Parlamento. Calquera diría que a cita de tantos presidentes só podía deberse á gran importancia do documento asinado. Se se accede a información oficial da Xunta, confírmanse as sospeitas, comprobando que, por fin, se dan pasos para a concentración e creación dun conglomerado de institucións científicas relacionadas co mar . Unha inversión de 100 millóns de euros que xunto coa cesión dos terreos pola Zona Franca van posibilitar o impulso do proxecto da Cidade do mar.

Sen embargo, lendo a información do voceiro do club constructor-popular, aparece unha realidade máis preocupante. Por de pronto, Zona Franca obtén máis edificabilidade a cambio da cesión. O uso residencial queda excluido pero haberá zonas comerciais, de restauración, hoteleiras e naúticas. Parece evidente que os destinatarios de tales servicios non serán os ciéntificos que ali se reunan senón que estamos ante ese espacio de ocio que tanto defenderon Toba e Porro. E aínda máis, haberá porto deportivo, tal como contemplábamos nun dos nosos primeiros pesadelos.

Por se non chegaban os indicios, C. Porro confirma que o protocolo respecta as condicións do Concello. ¿Quere decir que a cidade do mar vaise facer a partir do proxecto de Portela cun par de retoques? ¿Tivo Touriño que agachar diante dos intereses do trio Toba, Porro, López Peña?

Entón ¿compartirán pantaláns os buques oceanográficos coas embarcacións deportivas? ¿E esa a cidade do mar que querían os universitarios ou a asociación Outrovigoéposible? Despois de renunciar a instalar na Etea a sede do Parque Illas Atlánticas ¿seguimos recuando?

Só un ponto queda claro: os veciños teremos acceso ás instalacións, poderemos ver o mar a través dun bosque de paos, camiñar por un paseo e, se non son moi caras, tomar unhas consumicións.