Polo menos, sacade os vosos suxos barcos das Cies !!

Pois mira que a colleron co fondeo no Parque das Illas Atlánticas! Amezaron coa perda de postos de traballo, pediron negociar e agora como non lle dan o chupete, patalexan e din que se van concentrar. Esta Federación de navegadores de recreo e pescadores deportivos non ten vergonza. Aínda non se enteiraron que a figura do Parque Nacional é a de máxima protección é, por tanto, se supón que se aplica a cousas moi valiosas. Para eles o valioso debe ser só o seu barquiño e os seus 32 000 asociados ( habería que velos) pesan máis que os mil veces 32 000 que virán ano tras ano e xeneración tras xeneración a disfrutar e aprender no Parque. Os seus argumentos son poderosos: "ou pescamos todos ou non pesca ninguén". Recomendolles que visiten algún outro Parque Nacional e vexan como se respetan algúns aproveitamentos tradicionais e se prohiben usos abusivos. En Doñana, por exemplo, poden recoller a coquina nas praias pero os coches non entran no Parque.

As súas solucións de compromiso tamén denotan a súa altura de miras: "deberían proceder a balizar las playas y a partir de ese momento retirar la exigencia de esta documentación". É dicir , que organicen o parking e que nos deixen en paz. E pareceralles razoable. Pois non, os simples usuarios de praias xa estamos fartos de ter diante un espectacúlo tipo Porto Banús machacándonos o horizonte e mesmo poñendo en perigo a nosa integridade con pasadas moi vistosas a poucos metros da beira do mar. Eu non teño porque bañarme nun recuncho balizado para que vostede chegue a praia sen dar un paso. Esixo non 200 senón 1000 m de alonxamento en tódalas praias, e nas Cies, nen con permiso.

Lamentable, por fin, a súa petición de rebaixa das sancións " 6000 euros nos parece exagerado" din, "que se consideren como faltas leves y que se sancionen con una multa simbólica de 60 euros". O fin e o cabo, non din, 60 euros pola viaxe é un custo asumible. Igualiño que coas obras ilegais, pago de multa e via!!

Despois de tantas idas e voltas o Parque debe ter unha protección axeitada e hai que crear unha nova cultura de acceso público e solidario a este tipo de espacios. Imaxinen un centro de interpretación ben situado ( na ETEA , por exemplo) donde o visitante poida aprender en paneis, videos e proxeccións o proceso de formación das rías, as dinámicas da auga que producen tanta riqueza. Imaxinen un sitio donde se rememore o Pollycomander ou a loita contra o Prestige e donde os visitantes saian un pouco máis sensibles. Imaxinen, porque non? , unha tenda donde se merquen camisetas con motivos alusivos e recordos para os abós.Imaxinen que xusto ó lado o visitante poida coller un barco colectivo cheo de xente diversa que se sinte igual polo solo feito de ter sacado un billete. Imaxinen que chegan ás illas e efectivamente son illas e non puntos de amarre. Imaxinen, imaxinen... Pero de momento só imaxinasons.