As responsabilidades do PSOE vigués

Afirma a nosa Constitución, aventando vellas doctrinas dictatoriais, que os partidos políticos son o instrumento esencial de participación na política. Ese recoñecemento, que leva aparellados dereitos exclusivos e apoio mesmo económico, implica unha responsabilidade diante dos cidadáns sexamos ou non afiliados. Por iso non está de máis que xulguemos a executoria das organizacións representativas na cidade a poder ser antes de que o fragor da batalla electoral nos prive da tranquilidade necesaria.
O PSOE vigués, por exemplo, ven dando mostras contínuas de incoherencia empezando por un grupo municipal donde a maioría dos seus membros, empezando pola portavoz Porteiro, están desaparecidos da política diaria. A exclusiva batalla arredor do PXOM dada por Mauricio Ruiz vese como un esforzo individual dun concelleiro que estudia o tema, prepara iniciativas e mesmo recorre a cidade explicándoas. Sen embargo, o seu (sic) grupo municipal e non digamos xa a organización local asiste muda ós ataques de que ven sendo obxecto.
No gran problema do saneamento vigués o PSOE local agáchase tras as institucións autonómicas e estatais e , nen sequera, tiveron o detalle de facer autocrítica das súas responsabilidades cando as tiveron, por moito que Villarino anunciase que tería moito que dicir.
Pesía que nos discursos congresuais sempre aparecen as boas intencións de abrir os partidos á sociedade e atender ós problemas dos cidadáns a sensación que temos é a dun grupo autista, adicado a recolocar persoeiros como Carlos Príncipe na primeira fila e empregándose con ardor nunha batalla interna sen repercusións na cidadanía. O curioso desta actitude irresponsable é que dan por descontado que os cidadáns van seguir apoiando ó partido ben sexa porque así amolarán á dereita ou ben porque o efecto ZP é unha tormenta tropical que todo o arrasa.
A preparación das eleccións locais é outro botón de mostra de como funciona: o presunto candidato é colocado nunha institución administrativa - a autoridade portuaria- para facer a súa precampaña e o partido non pinta nada. Si xa séi que todos fan o mesmo, aquel coa dirección xeral do deporte e esta coa alcaldia e o plan parroquial, pero iso, lonxe de disculpar, agrava a responsabilidade.
Por último, a dimisión de Miguel Barros coa posibilidade do seu transito á unha formación nacionalista, da unha idea da confusión ideolóxica que existe no partido ainda que poderíamos discutir a porcentaxe que da citada confusión corresponde ó partido e ó individuo.
Gustaríanos saber se o PSOE local (ou no comarcal ou galego, tanto ten) fai unha reflexión relacionando a falla de gobernabilidade do Concello de Vigo e a ausencia clamorosa dun proxecto minimamente estructurado para a cidade co seu lastimoso estado organizativo. E no caso que tal reflexión exista ¿que pensan facer?
E, mentras tanto, Gayoso e Riera e APROIN tan contentos facendo e desfacendo cidade sen problemas.