Eventos do mundo mundial

Con pouco que un aprenda da experiencia nesta cidade, e sen necesidade de grandes análises, saberá que cando dende o Concello de Vigo se fale de que se vai celebrar o maior acontecemento mundial de algo, estase falando dun bluff, cuxo tamaño será directamente proporcional á insistencia sobre a grandiosidade do acontecemento nos periódicos locais. Tal cousa non tería maior relevancia no contexto dos fantasmas que sucesivamente nos gobernan, se non fose porque cada vez que se fai tal mundialista consideración, debemos mirar con temor aos nosos petos.
Efectivamente, estes acontecementos do mundo mundial, que deixarán unha riqueza inconmensurable na cidade e que mobilizarán entre o estándar de algo máis de "catrocentas mil persoas" e o máis redondo de "un millón de visitantes", forman parte dun mercadillo que se ofrece a alcaldes (ou bi-alcaldes, claro) de desenfunde rápido cando se trata dos diñeiros dos demais. A lista destes eventos que manteñen ao mundo pendente de Vigo e que acaba de culminar, en palabras do almirante Caballero, cun "éxito sen precedentes", coa saída da Tall Ships Atlantic Challenge, aumenta no último lustro, e está a punto de lograr que Vigo ocupe, esta vez sí, o primeiro lugar na lista de compradores compulsivos de grandes eventos, situándonos no mapa, pero no mapa cutre dos vendedores globais de eventos varios.
Unha primeira lista, a bote pronto, daralle ao lector a dimensión real da nosa importancia mundialista:
- Campeonato del mundo de multicascos 60, organizada dentro dos fastos da Volvo, pola Fundación do Deporte Galego en colaboración con Corina Porro (xullo 2005) (240.000 euros)
- Campeonato del mundo/copa Porro, de Boat GP, en agosto de 2005 (270.000 euros)
- Saída da Volvo Ocean Race, 2005 (canto menos uns 2,5 millóns de euros municipais, dos cales 1,5 millóns foron aportados, en convenio secreto, por ING Real Estate, e xestionados polas empresas relacionadas con Pilar Egea, xefa de gabinete da alcaldía de C.Porro)
- Cow Parade, (150.000 euros, polo menos, en merca institucional de vacas)
- Candidatura á Universiada, (1,3 millóns de euros)
- Campionato do mundo de Powerboat P1/memorial Tenente Domínguez, (300.000 euros)
- Tall Ships Atlantic Challenge, maio 2009 (240.000 euros)

As cantidades entre paréntese expresan -agás na Universiada e Volvo Ocean Race, que son estimacións do custo total- a cantidade que houbo que pagar só como "matrícula" para que o evento viñese a Vigo.
Un pode pensar que os nosos gobernantes son idiotas e que, de paso, se adican a enganarnos por deporte. Pero non. Cada acontecemento destes xera cuantiosos beneficios... para as empresas amigas e medios de comunicación asociados que teñen unha oportunidade incontestable para "contratar", por cantidades millonarias, publicidade, folletos, montaxes, villages, globos, carpas, comidas e demais parafernalia que acompaña aos eventos. Contentos quedan tamén os periódicos locais que, aproveitando a circunstancia, enchen de ampla e cromática publicidade as súas páxinas, e nos que, casualmente, raramente atopará vostede unha soa liña en defensa da razón, fronte a tanta mentira e derroche.
Contentes quedan tamén os intermediarios locais das empresas promotoras aos que lles toca unha parte da "cota" que obrigatoriamente hai que pagar en concepto de "matrícula" no acontecemento.
O caso da Atlantic Challenge é especialmente significativo xa que, ao non contar xa co potente patrocinio de Cutty Shark, o número de barcos presentes está directamente relacionado cos miles de euros que desembolse a cidade promotora. Así se explica que cos douscentos e pico mil euros desembolsados, só 12 barcos de certa relevancia (e só un realmente de grande eslora), da numerosísima flota mundial de grandes veleiros, acudisen a Vigo.

Menos mal que a flota de barcos tradicionais de Galicia presentes na Laxe e o marabilloso contorno desta dársena, salvou o acontecemento dende un punto de vista náutico e cultural. Ademais, a presencia destas embarcacións saíulle máis barata á organización: 200 euros os pequenos, 300 os grandes... e iso que non se invitou aos dous galeóns que Pedro Campos atesoura en Sanxenxo e que foran botados coa presencia do rei Juan Carlos.

Aínda que, se cadra, o que pasa con todo isto é que os vigueses somos todos parvos e Abel Caballero, Santi e C.Porro son tan listos que as nosas pobres mentes non dan acadado tanta sabiduría.