Un bebé ferido grave pola irresponsabilidade municipal

En Vigoblog levámolo advertindo dende hai tempo. A irresponsabilidade e ilegalidade da instalación de todo tipo de elementos publicitarios (tamén o é o alumeado navideño) enganchado a calquera sitio, acabará provocando un accidente. As ordenanzas municipais prohiben expresamente a colocación de calquera elemento estrano en elementos do mobiliario urbano (báculos) ou no arborado. Esta prohibición, lonxe dun capricho do lexislador, ten que ver coa necesidade de garantir a seguridade das persoas e os bens, pois, como diciamos recentemente referíndonos ao pendurado xeralizado de todo tipo de bandeirolas nos báculos de alumeado público, o fabricante non pode garantir a seguridade cando á farola se lle enganchan pesos e tensións non previstas no seu uso e condicións normais de funcionamento.

Tamén advertiamos en Vigoblog o maltrato ao arborado da Alameda ao pendurar del todo tipo de cables, focos, girnaldas e aparatexe diverso e, novamente, o incumprimento irresponsable das ordenanzas de medio ambiente do Concello de Vigo.

E o que tiña que pasar pasou: hoxe, unha cornixa desprendíase e fería gravemente a un bebé na rúa do Príncipe. Non ocorríu nun elemento do mobiliario urbano ou nunha árbore esta vez, pero perfectamente podería ter ocurrido e poderá ocurrir de seguir as cousas como ata o de agora. A iluminación navideña colócase á brava, enganchando cables unha e outra vez das fachadas das edificacións, perforando un ano tras outro con cravos de alpinista paredes pouco fiables e sen nin tan sequera ter o necesario permiso da propiedade. Engánchase a farolas, a outros cables telefónicos ou eléctricos, a balcóns e ao que sexa, seguindo as normas dictadas pola lei da selva, da mala práctica e da arbitrariedade que xa son norma común do noso Concello, dos seus munícipes e dos técnicos e policía local que, por acción ou por omisión, permiten estas barbaridades ilegais que se producen diante do seu narís co seu silenzo cómplice.

No desprendemento da cornixa de hoxe non estamos diante dun desgraciado accidente, senon da consecuencia necesaria dunha neglixencia grave, non só da empresa instaladora contratada, senon, sobre todo, dos responsables políticos que alentan imprudentemente e contratan estas obras ilegais e mesmo, ese día grande que tanto lles gusta, inauguran premendo dun botonciño e apertando a un meniño no seu colo.

Estes responsables teñen nomes e apelidos e deben pagar por isto. Deben, ademais, volver á orde establecida pola propia Administración á que se deben, e paralizar e replantear a colocación ilegal da decoración navideña, eliminar inmediatamente tódalas bandeirolas existentes nos báculos de alumeado público e facer desaparecer das árbores da cidade tódolos variados trebellos que, colocados pola propia Administración, permanecen meses pendurados delas, procándolles graves danos e, consecuentemente, aumentando os perigos de desprendementos.

A colocación do alumeado navideño debe ser unha acción planificada, controlada e executada con estricto respecto á legalidade, ás boas prácticas en instalacións ao aire libre e non un exercizo de irresponsable prepotencia que xamais se permitiría a un probo administrado.

Despois do incidente de hoxe, podémolo dicir con firmeza: estes señores, coa súa acción ilegal e irresponsable, xogan cada día coa súa credibilidade e coa nosa seguridade.

Dende VB non queremos unha investigación sobre a empresa instaladora, como agora anuncia cinicamente o tenente Domínguez, para determinar as causas concretas deste "accidente": diso xa se ocupará o xuiz, que esperamos que chegue ata as últimas consecuencias. Dende VB denunciamos que esta posibilidade de accidente era coñecida sobradamente e sistematicamente obviada polos responsables municipais, que fixeron ouvidos xordos aos que, como nós, levan moito tempo advertíndo do perigo e ilegalidade da práctica "publicitaria" do Concello de Vigo no espazo publico.