O Parque temático en Castrelos que proxecta Abel Caballero é ilegal

O parque de Castrelos de Vigo está declarado como Ben de Interese Cultural, máxima figura de protección legal que a lexislación española ten para un elemento histórico. Está declarado xardín histórico e se protexe, ademais do pazo e dos Xardíns dentro dos muros deste, o parque e tódolos seus elementos.
O parque está, ademais, catalogado como de protección integral no vixente Plan Xeral de Ordenación Municipal e sometido ás ordenanzas que para esta catalogación dispoñen as súas normas urbanísticas.
Tales declaracións significan que non é posible realizar ningunha modificación que vaia máis alá da súa conservación e mantemento, canto menos mentras non se aprobe un Plan Especial de Protección previsto na normativa citada, no que se contemplen, no seu caso, reformas ou actuacións que modifiquen os seus elementos protexidos.
A lexislación española nesta materia trata xustamente de impedir que coxunturas ou ocorrencias dos gobernantes de turno -como no caso do "Parque temático" que Abel Caballero pretende montar no parque de Castrelos- poidan afectar aos bens protexidos e modificar os valores que o lexislador quixo preservar para as futuras xeracións.  Ademais, para o caso que nos ocupa, a creación dunha infraestructura de xogo como a proxectada por Caballero, requiriría, en todo caso, a previa e obrigatoria autorización da Consellería de Cultura da Xunta de Galicia, organismo legalmente competente para a preservación dos bens do patrimonio cultural de Galicia expresamente declarados.
Toda a actuación que se faga neste ámbito protexido, que non teña a previa autorización da Xunta de Galicia e que non teña en conta a norma que os protexe é ilegal. E a  actuación que pretende Caballero realizar á brava, nada menos que ocupando 10.428 m2 (o 5% da súa superficie),  sen considerar nin a declaración como Ben de Interese Cultural do parque, nin a calificación como de protección integral recollida no PXOM, é ilegal e debe ser denunciada e, no caso de persistir conscientemente na ilegalidade, procesados os seus promotores por prevaricación.

No uso da legalidade, Caballero utiliza un dobre raseiro. Parécenos moi ben que se paralicen as obras electoraleiras de Corina Porro no Porto de Vigo, ao consideralas ilegais por non figurar no Plan Especial do Porto. Pero esa mesma vara de medir tense que aplicar aos ámbitos que están baixo a xurisdicción da "Alcaldía de Vigo" que, como no caso de Castrelos, requiren, para realizaren neles obras, máis alá das de mera conservación, un procedemento especial contemplado nas Leis do Patrimonio histórico español e galego e na propia norma urbanística municipal, o PXOM. Un procedemento que -vista a inminencia anunciada no inicio das obras para xaneiro- Caballero está disposto a saltarse á torera.
E non valerá que cando a Xunta de Galicia, no seu obrigado cumprimento da legalidade vixente -que lle recordaremos dende aquí se fai deixación do mesmo-, ordee a paralización das obras, apelar a complots contra as obras do alcalde por parte do PP, como xa fixo durante as irregulares obras realizadas pola alcaldía no contorno do xacemento arqueolóxico do Castro de Vigo para instalar a escultura do bicentenario. Cando chegue a obrigada paralización, esixiremos o cumprimento da lei e o sometemento do alcalde ao estado de Dereito, cerne da democracia e garantía de seguridade xurídica para os cidadáns fronte á arbitrariedade dos gobernantes de turno.

E todo isto, sen entrar no fondo da cuestión: a terrible constatación de que aos nosos gobernantes, sexan do bi-goberno ou da oposición, con tal de ofrecer caras obriñas para os seus eleitores menos formados, dálles igoal o patrimonio común ou a legalidade, sexa esta a  que protexe o parque de Castrelos, os edificios históricos do Casco Vello ou os tradicionais  pavimentos dese barrio protexidos polo PEPRI Casco Vello.

E así nos vai.