O BNG pretende nomear a un administrativo como director do Verbum

O acceso á función pública está fundamentado constitucionalmente nos principios de publicidade, igualdade, mérito e capacidade. Conforme a eses principios, a lei establece procedementos de acceso baseados na interdicción da arbitrariedade e no estricto cumprimento da legalidade en materia de emprego público. Pero no Concello de Vigo o principio de legalidade está a ser sustituído, con todo o descaro, polo de reparto do botín. De que outra maneira senon se lle pode chamar a que, segundo informa hoxe La Voz de Galicia, se tente nomear a dedo a un administrativo (bachaler) do Concello de Vigo, militante da ala dereita do BNG (hai outra?), como director do Verbum-Casa das Palabras?. Na plantilla municipal este posto de director está reservado a funcionarios do grupo A (licenciados universitarios) e non pode legalmente ser ocupado por un funcionario que non ostente este nivel profesional e académico.

Pero visto o visto, ao BNG a legalidade tráelle máis ben sen coidado. Por se non abondase con repartirse soldos millonarios entre os seus militantes e amigos en forma de postos de confianza que non precisan estar en plantilla (nada menos que cinco, con soldos que, nalgúns casos, acadan os 60.000 euros anuais), sen máis mérito cá ser da corda ou adicto a Santi; por se non chegase con fixarse para os seus concelleiros salarios que nunca soñaron na súa profesión (os que teñen algunha), agora tamén continúan o seu asalto á administración pública, parasitando os postos de plantilla da administración pública que deben ser cubertos conforme a un procedemento que garanta os principios de mérito e capacidade e ser conforme ao cadro de persoal aprobado pola Corporación municipal. Este xeito de actuar parece ser xa o normal na práctica de goberno deste grupo se nos atemos ao que semella que está a ocorrer no Consorcio Galego da Igualdade e do Benestar, xerenciado -meu deus!- por Pérez Castrillo e denunciado reiteradamente polas súas supostas prácticas de enchufismo e amiguismo.

O nomeamento de Rosendo Covelo como director do Verbum, de confirmarse, vén tamén demostrar o cortito que anda Santi en relacións: o seu home de máxima confianza era -mentras el foi concelleiro de deportes con Castrillo- xerente do Instituto Municipal de Deportes; a súa "coordinadora" de asesores é unha auxiliar administrativo que traballaba con el na mesma oficina de Deportes. O que agora pretenden nomear director do enxendro do Verbum é, outra vez, un administrativo destinado tamén á mesmiña oficina na que, ata hai escasos meses, ocupaba o posto de auxiliar. Un mundo cativo para un cativo político profesional... de andar por casa.

La Voz déixa claro cal é o mérito que se pode alegar de Rosendo Covelo -aínda que nada di da súa capacitación profesional-: "vice secretario xeral del área de Organización del Partido Nacionalista Galego, y representante de este partido en el Consello Nacional del Bloque Nacionalista Galego".

Xa saben, nais e pais, iso de estudiar aos fillos é un atraso; xa o saben opositores variados: de nada vale pasar tódalas horas do mundo diante dunha mesa de estudio. A solución está en deseducar para ser un disciplinado membro dun partido con posibilidades de tocar poder... e a poder ser, non facerlle a máis mínima sombra nin intelectual, nin política nin cultural ao xefecillo de filas.

Tal política que substitúe a legalidade pola arbitrariedade do "ordeno e mando", que reparte diñeiro público aos do partido polo mero feito de sélo, que forza a norma para contratar cantidades millonarias sen concorrencia previa con empresas de publicidade afíns ou cos medios de comunicación, non é desgraciadamente, patrimonio do BNG, aínda que hoxe sexa a nova a comentar. Un forte cheiro a bárbara utilización da administración pública e de violentado dos procedementos legalmente establecidos, está a sair do bi-goberno municipal e dos seus acólitos asesores, empeñados en deixar a Corina como unha alma cándida cos seus millonarios gastos de publicidade e contratos a empresas afíns.