O Castro

Xa o pediamos hai tempo dende Vigoblog: demoler o edificio Montemar, antigo Restaurante El Castillo, ese adefesio en falso histórico propiedade do Concello de Vigo, que ocupa ilegalmente parte da muralla do Castelo do Castro. Parece que finalmente se impón algo de racionalidade: o proxecto municipal, o sábado anunciado polo oficioso portavoz patrocinado do goberno municipal, prevé a súa demolición e, o que é máis importante: a inclusión desta acción nun proxecto máis amplo para o conxunto do parque.

Máis dúbidas temos sobre o resto das propostas que se inclúen, como a da utilización intensiva do subsolo para seguir construíndo na zona. Parécenos moi ben que, por fin, o Concello se plantee, canto menos sobre o papel, a recuperación integral do Parque do Castro. O Castro contén valores e recursos históricos, naturais e sociais moi importantes para Vigo e son estes os que deben ser protexidos e aquelados para o disfrute e comprensión de todos. É sobre eles, e non sobre a consideración aséptica deses espacios como mero solar a urbanizar con algunhas cargas históricas, sobre os que se debe articular seriamente calquera proxecto de recuperación e mellora do uso público.


En primeiro lugar, coa reducción da presión urbanística sobre o xa mermado espacio, moi reducido pola invasión progresiva de edificación e urbanización das súas ladeiras. Ás zonas xa perdidas a favor da especulación, como a ladeira limítrofe coa Vía da Hispanidade, ou Marqués de Alcedo, non se lle debe agora sumar a operación do mesmo carácter prevista no Plan Xeral na zona da rúa Arines e Praza de España.

En segundo, a plena recuperación da muralla do Castelo do XVII, cun proxecto intelixente de musealización e, en ningún caso, de utilización do espacio para outros usos distintos aos da plena consecución dunha óptima lectura histórica e arqueolóxica do recinto. Dentro desta recuperación débese incluír a magnífica rede de galerías e minas e conduccións subterráneas de auga de carácter histórico que teñen a súa orixe no Castelo e percorren as súas ladeiras.

En terceiro lugar, ningunha actuación no monte do Castro debería facerse sen articularse co respecto e comprensión do monte como antigo poboado da idade do Ferro e Romanización, auténtico berce, xunta co núcleo urbano romano do Areal e do Casco Vello, de Vigo. Neste sentido deberían acometerse estudios en profundidade para completar o coñecemento dos restos existentes, realizar as excavacións arqueolóxicas precisas para descubrir os que de seguro faltan por coñecer e dispoñer o conxunto como un xacemento visitable de acordo cos planteamentos da museoloxía actual.

Por último, as actuacións deberan ter presente, articulada e dependente das consideracións histórico-arqueolóxicas, o planeamento da cuberta vexetal para facela compatible, por unha banda, coa preservación e comprensión dos restos históricos e, por outra, co carácter de miradoiro privilexiado e zona verde que o monte do Castro sempre tivo e ten para os vigueses.

Complementariamente deberíase plantear a mellora da accesibilidade, co menor impacto posible sobre a súa topografía e vistas Isto pasa, posiblemente, por prever medios mecánicos de subida nalgúns puntos e, tamén, por fixar unha liña de transporte publico permanente con paso pola rotonda superior.

Pensamos que, no seu caso, os equipamentos que se deseñen nun proxecto de rexeneración integral do noso monte por antonomasia, deben estar dirixidos exclusivamente a dar cobertura aos aspectos que dan valor engadido ao noso monte: arqueolóxicos, históricos, paisaxísticos, naturais e de zona verde. Para sedes institucionais e demais virguerías soterradas, outros lugares haberá máis apropiados.

FOTOS:
- O Castro nunha postal do anos 60-70 do pasado século
- Vista aérea do Castro na actualidade (Google maps)