Ría de Vigo: contaminación con responsables

Parece que algo se move na denuncia sobre os vertidos ilegais de augas contaminadas á Ría de Vigo. La Voz de Galicia informa hoxe que catorce colectivos (confradías de pescadores e plataformas veciñais, entre outros) realizaron onte un percorrido pola ría para denunciar os puntos negros da súa contaminación, acompañados polo deputado de Los Verdes Francisco Garrido.

O día elixido para o percorrido non puido ser máis oportuno, pois contaron coa alianza -non podía ser menos- da madre natureza que os obsequiou onte con chuvascos intensos que provocaron novamente un brutal vertido de augas residuais polos "aliviadeiros" do litoral. Onte podíase ver por enésima vez (e con especial intensidade) as inormes manchas leitosas de augas contaminadas, no litoral dende Bouzas á Guía (casualmente o que os científicos afirman que ten maior contaminación por metais pesados), acompañadas a flote cos habituais residuos sólidos (as resistentes miles de compresas e restos de condóns...) que rodeaban ao trasatlántico atracado na Estación Marítima.

Como ben indicou onte en Vigo Ricardo Prego, do Instituto de Investigacións Mariñas, "son moito máis perigosas as pequenas entradas de contaminantes ao medio, día a día, que unha gran catástrofe". O noso Concello, responsable da rede de saneamento, cada día, chova ou non, verte á ría augas residuais sen controlar nin depurar, pese a estar legalmente obrigado a cumprir as normativas europeas, españolas e locais sobre vertidos. Estamos ante un caso reiterado de incumprimento que ten xa, como consecuencia administrativa máis evidente, a multa da Comisión Europea de 20 millóns de euros. Dende Vigoblog crémos que estamos diante dunha grave irresponsabilidade que debería investigarse penalmente, pois estase xogando, impunemente coa nosa saúde.

Vigoblog continúa e continuará denunciando e informando dobre estes feitos presuntamente delictivos que, lonxe de ser incidentes desgraciados, teñen responsables con nomes e apelidos, por máis que continúen obviando o problema e enganando sobre as solucións.
Os indicios sobre graves irregularidades na xestión do saneamento en Vigo son máis que suficientes. Crémos que se debe esixir a creación dunha Comisión de investigación que determine os feitos e as responsabilidades e dea conta, se fose preciso, ao ministerio fiscal... aínda que moito nos tememos que tal investigación poñería de manifesto a responsabilidade política, canto menos, de tódolos partidos presentes na Corporación municipal viguesa.
¿Será por iso polo que ninguén move máis ficha que a evasiva esixencia dunha nova depuradora -co seu brutal custo económico, ecolóxico e social- cuxa necesidade nunca foi minimamente demostrada?.
¿Terán que ser Los Verdes dende Madrid os que finalmente denuncien?