ETEA

A reacción desproporcionada e estridente da coalición urbanística PP-BNG no Concello de Vigo despois do anuncio do proxecto de Cidade do Mar para a ETEA, lembra, sen transición, ás reaccións dos Toba-Corina-Figueroa cada vez que o efímero goberno de Ventura Pérez Mariño propoñía algunha iniciativa que puxera en perigo os estreitos e extraños intereses destes atípicos socios. Do mesmo tipo é a reacción inmediata e planificada do Faro de Vigo, encargado, como se fose algo contractual, de amplificar cantas cousas neste ámbito urbanístico oubeen "airados" Toba, Figueroa e Corina. ¿A que se opoñen realmente os socios urbanísticos do Goberno?: a calquera opción que se plantee para as intalacións da ETEA contraria á súa privatización.
A xenial idea dos socios urbanísticos do goberno municipal de Vigo é a privatización e especulación cos terreos da ETEA para crear un "parque temático", un Vigodisney ruinoso (os do Bloque, para que pareza máis serio chamáronlle "Euromar" (¡) que permita logo da súa previsible ruina, a plena explotación da zona polas multinacionais do comercio e o ocio (nisto teñen os socios urbanísticos xa unha experiencia de colaboración fructífera en Finca do Conde coa multinacional holandesa ING Real Estate).
A opción de adicar as magníficas e inmediatamente operativas instalacións e edificios da ETEA a un fin público tan interesante como a creación dun gran centro de referencia mundial sobre estudios mariños, parécelle a Corina "un engaño a Vigo" e a Toba unha "chorrada e unha milonga".
Quen coñece a ETEA sabe que o pior que se podería facer con este espacio sería rachar co seu carácter unitario, con edificios perfectamente conectados e conectables entre si, cun espacio axardinado de gran calidade, perfectamente compatible co uso restrinxido e aberto que Teis e Vigo necesitan e potencialmente -a pouco que se faga un esforzo de xestión e deseño- unible á gran zona verde da Guía por un lado e, á súa zona litoral, por outro.
O proxecto de Cidade do Mar encaixa moi ben co que hoxe aínda existe na ETEA, semella razoable, necesario e viable; parece compatible co uso público ordenado do espacio verde e dalgunha das súas instalacións (a piscina, o campo de fútbol e atletismo). Realizar esa Cidade na ETEA, permite unha magnífica rendabilización do diñeiro público (o de todos, Corina-Toba) pois con adaptacións de pouco calado, as instalacións pódense adaptar optimamente ás finalidades de investigación e formación previstas. Situar a Cidade do Mar na ETEA, permitirá, de xeito inmediato tras a súa apertura, mesmo a estancia de investigadores de todo o mundo, nunhas magníficas instalacións, pois actualmente as residencias existentes no recinto para oficiais e suboficiais, son inmediatamente operativas para estes usos.

¿Que é o que se están a xogar os Corina-Figueroa-Toba nestas operacións para que se poñan tan tolos co que é -en calquera caso, estéase ou non de acordo- unha idea viable e razoable?. Eles saberán. Nós sospeitamos.