Sen dirección

A Escola de Artes e Oficios non ten director. Unha longa baixa por enfermidade do que exerce tal función, José Armesto -que previsiblemente continuará aínda tempo-, cúbrese a tempo parcial e sen máis trámite, por unha funcionaria do departamento municipal de Persoal, que, polo que nos conta Raquel López, non pisa moito a sede da Escola en Gacía Barbón.
O Museo Municipal de Castrelos dende principios de outubro de 2005 tampouco ten director, o que vén a mermar máis, se tal cousa é posible, a súa escuálida plantilla: un par de administrativos e un feixiño de guías sen especializar. O que viña exercendo a dedo a dirección do Museo, José Ballesta, supoñemos que aburrido no vello caserón da finca da Marquesa, colleu un permiso de un ano sen soldo. Tampouco ten recambio, nin a dedo nin polo regulamentario e mal visto concurso.
O Verbum-Casa das Palabras: sen persoal, sen proxecto, visitado só por escolares acarrexados en buses polo propio Concello, ten nominalmente un director, Lois Cea, posto a dedo por decreto de Corina en xuño de 2005, con nula experiencia e recentemente destapado como firmón no Auditorio, pero non ten dirección, se nos atemos á traxectoria errática -por dicir algo- que leva. O Arquivo Pacheco aínda segue ancorado na extraordinaria idea de "O ano do retrato".
O Parque zoolóxico da Madroa, único zoo de Galicia e norte de Portugal, sempre tivo problemas coas aves: agora co da gripe aviar, antes, segundo contan, cando hai anos o finado Leri, co gallo ;-) das obras de reforma, se emperrou -desoíndo, como era habitual, os criterios do veterinario-director- en meter provisionalmente todo animal con plumas nunha soa gaiola, ata que só quedou ún, nunha cruenta imaxe de devoración medieval. Como daquela, chégannos novas de que ao director-veterinario, Juan Freitas, fanlle pouco caso e que por alí mangonean máis outros paxaros.
O Museo Liste ten director pero, polo que se ve, non debe ter porteiro: con sorte, se petas na porta, ábrenche.
O Arquivo municipal, (por chamar dalgún xeito o almacén onde se garda a "memoria" do Concello) malvive dende hai anos sen dirección. Isto é o que pasa nun arquivo cando non hai arquiveiro nin documentalista, senon un probo funcionario sen especialización que tivo a mala ou boa sorte de caer por alí un bo día, despois de que se xubilase o inefable cronista oficial nomeado por Manoel Soto, Lalo Vázquez Gil (que por certo segue vivindo "intelectualmente" das rendas que lle deron a lectura dos documentos enterrados nos sotos municipais).
Na Biblioteca Penzol, como se a xubilación non fose algo que a todos nos toca algunha vez, Francisco Fernández del Riego exerce a dirección tipo persoeiro, ocupando honorificamente un posto de traballo que debera estar cuberto dende hai moitos anos por un facultativo.
O caso do Museo do Mar é á inversa: hai director, pero non hai Museo, o que non deixa de ser unha curiosidade reseñable neste panorama.

Pero á sociedade viguesa abóndalle conque as cousas funcionen só nos medios de comunicación subvencionados. O de menos é que realmente existan e cumpran o que a sociedade lles ten encomendado.

Mentres tanto, seguirase admitindo, por exemplo, que mentres no MARCO se realiza todo un proceso regulado para a elección de Director, no resto dos organismos culturais tal cousa, polo que se ve intranscendente, se deixa ao capricho ou ao interese da Corina ou do Chaves de turno.