Benvida á enerxía solar

O último pleno do Concello ven de aprobar a ordenanza municipal sobre captación e aproveitamento da enerxía solar para usos térmicos en edificacións e instalacións no termo municipal de Vigo. Hai que se felicitar, xa que logo, que o criterio de sostibilidade apareza nas decisións do concello.

A ordenanza toma como modelo á que levou adiante a cidade de Barcelona no ano 2000 dentro do seu Plan Enerxético. Según unha avaliación realizada a principios do presente ano, a implantación da ordenanza permitiu aforrar 19 625 MWh/ano (uns 15 700 000 de euros) e o que é máis importante se cadra, unha reducción de emisións de CO2 de 3 451 toneladas. Por outro lado, o custo das instalacións son relativamente baixos: un edificio de 18 vivendas precisaria uns 40 m2 de captadores presupostadas en 21 000 euros dos que aínda hai que deducir as axudas e subvencións. Sobre a fiabilidade da instalación nada que obxectar pois trátase en tódolos casos de instlacións mixtas solar-gas ou solar-gasoleo.
A falta dun estudio pormenorizado da ordenanza que nos de máis pistas sobre o seu alcance, habería que completar o traballo en matería enerxética coa elaboración dun Plan Enerxético que enmarcara as actuacións municipais. Fanse necesarios criterios para planificar alumeados, calefaccións e refrixeracións e, sobre todo, o problema do transporte (¿ten algún futuro a rede de aparcamentos proposta?)
O concello, por outro lado, debería promover actuacións emblemáticas neste terreo. A instalación de captadores solares nas instalacións educativas, por exemplo, terían un doble efecto: o aforro e a sensibilización mediomabiental. Agardemos que as novas autoridades da xunta e os concelleiros de Vigo perseveren neste camiño.

Mais información: Axencia da Enerxía Barcelona