Vertidos industriais -enésima vez

Levamos en Vigoblog nada menos que 32 entradas directas adicadas ao tema dos vertidos industriais e da depuración de augas en Vigo. Trinta e dúas veces, dende hai máis de dous anos, denunciando a irresponsabilidade do/s gobernos municipais sobre este tema, e o uso puro e duro da propaganda para tapar temas de saúde ambiental por parte dos responsables ("técnicos" e políticos) municipais. Denunciando as cortinas de fume en forma de visitas con botas de auga e caxatos ao rio Lagares e reclamando que se cumpra a normativa de vertidos que dende o ano 1994 está vixente en Vigo.

Agora o Faro de Vigo descubre a pólvora e infórmanos do que xa sabiamos e informamos xa hai moito tempo: que as industrias nesta cidade están fóra de control no que se refire á xestión dos seus vertidos contaminantes, que se desfán deles non se sabe onde ou directamente sen depurar aos colectores e, destes, á depuradora. Unha instalación que tivo un custo millonario e que ten que apandar cunhas substancias que nunca deberían chegar a ela e que, con seguridade, son unha das causas evitables do seu mal funcionamento. O Faro orixina esta información en informes de inspectores municipais. Algo non encaixa nesta vaina: ou non había antes inspectores, ou non facían ou seu traballo, ou facían o seu traballo e non lles facían caso... Porque as industrias das que falan (e só falan dunha parte, das que están nas beiras do Lagares) levan moitos anos incumprindo.

A Unión Europea debería estar informada disto, antes de dar o entolecido paso de facer unha macrodepuradora na Xunqueira do Lagares. Non se pode arranxar o problema medioambiental e sanitario dos vertidos cunha "solución" ao final do proceso. Porque se non se pon orde no sistema de vertido a colectores, a macrodepuradora volverá a "botar por fóra", por máis moderna e soterrada que sexa, ao ser sistematicamente "atacada" pola diversa e descontrolada variedade de productos químicos e residuos industriais que diariamente van polos tubos.

Non é a primeira vez que apuntamos responsables. Existen, son coñecidos, están localizados e deberían xulgalos por xogar coa nosa saúde e coa do noso entorno.

Dende Vigoblog buscamos nas hemerotecas , axitamos a memoria, e afirmamos que o que acaba de declarar Chus Lago a Faro de Vigo é a mesma cantinela repetida durante anos polos responsables municipais de Medio ambiente e de saneameno dende a aprobación en 1994 de primeira ordenanza municipal de vertidos (Lola Villarino, Montero, Amador Fernández, Chus Lago) sen que nunca fixeran absolutamnete NADA para solucionalo, agás encherse a boca facéndose pasar polos descubridores de tamaña ilegalidade e firmes defensores da súa persecución.

Mágoa das hemerotecas...

Ninguén se anima a poñer unha denuncia na fiscalía ou un informe para a Unión Europea contándolles cómo se gastaron os seus diñeiros para Plans de saneamento en Vigo? máis que nada para que non sigan facendo o pardillo.