Outra ocorrencia

Informa o Faro que dende as concellerías de Cultura e Patrimonio Histórico preténdese adicar o Museo de Castrelos soamente a arqueoloxía. Novamente un goberno municipal volve desprezar as propias institucións e, en lugar de someter a unha delicada análise a situación museística de Vigo e, en especial, a do seu Museo máis representativo, comeza polo final, dando respostas sen tan sequera ter sabido plantexarse as preguntas.

O modelo volve a ser semellante ao de López Chaves que continuou co xa tradicional maltrato a un Museo sen dirección, persoal nin proxecto, montou pola súa conta unha sala bonsai de arqueoloxía ao estilo de museíño de aldea e, finalmente, arreou unha campaña surrealista sobre un ungüentario bizantino, xaleado polo seu pai, que ten na tal peza unha revelación divina coa que continuar co seu "machito" viguista do Camiño Portugués.

Calquera cousa, calquera ocorrencia, menos plantearse seriamente un proxecto museolóxico para Castrelos, que parta do respecto e comprensión das magníficas e maltratadas coleccións que atesoura, que aprenda da súa historia, decindindo, só ao final dun proceso de estudio, discusión e diálogo, cal debe ser o futuro máis razoable para este patrimonio.

O que faltaba é que a ousadía e a ignorancia manifestada por C. Porro ao levarse parte da colección de pintura de Castrelos ao caserón do Areal para mellor encher o seu persoal baleiro cultural, se consolidase agora por parte da Maure e do Xésus, aparcando no antigo reitorado os cadros de Castrelos baixo o supremo mando dun conserxe.

P.S. Falando de Maure... tería tal inspiración en Bangkok?... por certo, estamos esperando un informe completo sobre a singular expedición, para saber en que nos gastamos os cartos os vigueses.