O galiñeiro municipal axítase

A noticia no Faro de Vigo da inexistencia de medios para o mantemento dos espacios públicos en Vigo pasou desapercibida, aínda que expresaba timidamente o que é un secreto a voces: o médico José Manuel Iglesias Carrera, concelleiro de Vías e Obras do Concello de Vigo non está contento. Dende hai tempo está a ser ninguneado pola actitude depredadora e autocompracente de Corina e Cia. Quen estea coa pituitaria avizor no estercoleiro municipal, saberá que no grupo do PP non se aturan uns a outros, e que case ningún deles atura a Iglesias. Nada extraño se temos en conta que este edil é un home razoablemente culto, educado, pouco ambicioso economicamente e cunha sensibilidade persoal manifestamente superior ós do resto do galiñeiro do goberno municipal e gabinete da alcaldía. Estas características só poden levar no contexto do Concello vigués á marxinación ou ó desastre.
Algunha razón terá para permanecer aínda na Corporación nestas degradantes circunstancias, pero auguramos que non rematará a lexislatura, pois un día si e outro tamén, a voracidade ben da Porro, ben de Iznogood-Figueroa, déixano só perante o perigo nas duras, e fóra de xogo nas maduras.
El saberá o que se xoga.

Foto: www.vigo.org